O‘tgan hafta mamlakatimizda xavfsizlik sohasida jiddiy voqea ro‘y berdi. Davlat xavfsizlik xizmati tarqatgan rasmiy ma’lumotga ko‘ra, 19–21 yosh oralig‘idagi uch nafar yosh qiz qonunchilikda taqiqlangan terroristik tashkilotlarga tegishli materiallarni tarqatgani uchun qo‘lga olindi.
Ma’lum qilinishicha, 2004–2006 yillarda tug‘ilgan bu yoshlar diniy bilim olishga qiziqish niqobi ostida Telegram messenjerida maxsus kanal ochishgan. U yerda ular O‘zbekiston hududida taqiqlangan “Iroq va Shom islom davlati” hamda “Turkiston islom harakati” kabi jahon hamjamiyatida xavfli deb topilgan ekstremistik tashkilotlarining audio va video targ‘ibot materiallarini tarqatib kelishgan.
Bundan tashqari, ushbu qizlar faoliyati faqat ochiq kanal bilan chegaralanmagan. Ular yopiq va yopiqligi tufayli kuzatuvdan qochish mumkin bo‘lgan boshqa guruhlarda ham targ‘ibot ishlarini olib borgan. Davlat xavfsizlik xizmati xabarida aytilishicha, ular ekstremistik g‘oyalar bilan zaharlanib, Suriyadagi qonli urushlarga qo‘shilish haqida o‘zaro mulohaza almashishgan. “Jihod”, “hijrat” va “shahid” kabi yolg‘on va manipulyativ shiorlar ular uchun go‘yo hayotiy maqsadga aylangan.
Faoliyat ko‘lamini kengaytirish maqsadida ular Instagram tarmog‘ida shaxsiy sahifalar ochib, taqiqlangan materiallarni yanada ko‘proq yoshlarga yetkazishga uringan. Bu orqali ular nafaqat ma’lumot tarqatish, balki yoshlarni turli yolg‘on va xatarli yo‘llarga boshlashni ham maqsad qilgan.
DXX va boshqa huquqni muhofaza qiluvchi organlar hamkorligida amalga oshirilgan tezkor-qidiruv tadbirlari natijasida ushbu shaxslar qo‘lga olindi. Hozirda ularga nisbatan qonun doirasida qat’iy choralar ko‘rilmoqda.
Mutasaddilar ta’kidlashicha, bu kabi holatlar yoshlar orasida kiberxavfsizlik va axborot madaniyati haqidagi bilimlar yetarli emasligini ko‘rsatmoqda. Shu bois, ekspertlar internetdagi har qanday shubhali kontent va targ‘ibotga nisbatan hushyor bo‘lishga chaqirmoqda.
“Zamin”ni Telegramʻda oʻqing!
