13 avgust kuni Surxandaryo viloyatidagi avto gaz quyish stansiyasida sodir bo‘lgan portlash va yong‘in haqidagi xabarlar ijtimoiy tarmoqlarda tez tarqaldi. Hodisa videosi ham paydo bo‘lib, qisqa fursat ichida muhokamalar markaziga aylandi.
Viloyat Favqulodda vaziyatlar boshqarmasi ma’lumot berishicha, voqea soat 12:58 da ro‘y bergan. Ta’kidlanishicha, portlash va yong‘in yoqilg‘i avtosisternadan zaxira saqlash rezervuariga ko‘chirilayotgan paytda texnologik jarayon qoidalari buzilgani oqibatida yuz bergan. Bu esa qattiq yoqilg‘i-havo aralashmasining yonishiga va kuchli chaqnashiga olib kelgan.
Hodisa joyiga viloyat va tuman FVB rahbarlari shaxsan yetib borishgan. Qutqaruv va yong‘in o‘chirish guruhlari shiddat bilan ishga kirishib, atigi 15 daqiqa ichida yong‘inni to‘liq nazoratga olishgan. Shu bilan birga, hodisa natijasida jabrlanuvchilar va katta yo‘qotishlar haqida hozircha rasmiy ma’lumot berilmadi.
Mutaxassislar aytishicha, AGZSlarda texnologik qoidalarga qat’iy rioya qilish nafaqat xodimlar, balki atrofdagi aholi xavfsizligi uchun ham juda muhim. FVB esa bunday holatlarni oldini olish maqsadida qo‘shimcha profilaktika choralarini ishlab chiqish va joriy etish rejasini bildirgan.
“Zamin”ni Telegramʻda oʻqing!
