Toshkent viloyatining Bo‘ka tumanida yo‘l harakati paytida Matiz rusumli yengil avtomobilda yong‘in chiqdi. Viloyat Yo‘l harakati xavfsizligi boshqarmasi ma’lumotiga ko‘ra, hodisa 15 avgust kuni taxminan soat 12:00 atrofida D020 “Qorasuv – Bo‘ka – Bekobod shahar” avtomobil yo‘lining 35-kilometrida ro‘y bergan.
Ma’lumotlarga ko‘ra, 1992 yilda tug‘ilgan haydovchi boshqaruvidagi Matiz yo‘lda harakatlanayotgan vaqtda avtomobilning dvigatel qismida qisqa tutashuv sodir bo‘lib, yong‘in kelib chiqqan. Oqibatda salonning old qismi va muharrik sohasi qattiq zarar ko‘rgan.
Yo‘l harakati xavfsizligi xizmatining ta’kidlashicha, hodisa natijasida haydovchi yoki yo‘lovchilar sog‘lig‘iga zarar yetmagan. Voqea joyiga yetgan yong‘in-qutqaruvchilar yong‘inni qisqa fursat ichida to‘liq o‘chirishga muvaffaq bo‘lishgan.
Hozirda Bo‘ka tumani Favqulodda vaziyatlar bo‘limi tomonidan yong‘in sabablarini aniqlash va to‘liq tekshiruv ishlari olib borilmoqda. Mutasaddilar haydovchilarga avtomobil texnika holatini muntazam tekshirish va elektr tizimidagi nosozliklarni o‘z vaqtida bartaraf etishni tavsiya etmoqda.
“Zamin”ni Telegramʻda oʻqing!
