Farg‘ona shahrida sodir bo‘lgan noxush holat yo‘lovchilar va haydovchilar orasida katta muhokamalarga sabab bo‘ldi. Viloyat YHXB ma’lumotlariga ko‘ra, 18 sentyabr kuni soat 12:00 larda haydovchi o‘zining “Labo” rusumli avtomashinasiga gaz to‘ldirish maqsadida maxsus stansiyaga kirgan. Biroq ehtiyotsizlik sabab u propan uchun mo‘ljallangan balonga metan gaz qo‘yib yuborgan.
Xato to‘ldirish oqibatida transport vositasiga o‘rnatilgan gaz baloni keskin portlab, avtomashina texnik jihatdan jiddiy shikastlangan. Omadga ko‘ra, hodisa vaqtida biron-bir fuqaro tan jarohati olmagan.
Hozirgi vaqtda mas’ul idoralar ushbu voqea yuzasidan qo‘shimcha o‘rganish ishlarini olib borishmoqda. Mutasaddilarning ta’kidlashicha, bunday holatlar ko‘pincha haydovchilarning gaz turlari haqida yetarli ma’lumotga ega emasligi va xavfsizlik qoidalariga beparvo qarashi oqibatida yuzaga keladi.
Eslatib o‘tamiz, bundan avval ham Surxondaryo viloyatidagi metan quyish shoxobchasida “Neksiya-2” avtomashinasi portlagani haqida xabar berilgan edi.
Mutaxassislar haydovchilarni gaz turlarini aniq ajratish, avtomashinadagi uskunalarning texnik holatini muntazam tekshirib turish hamda quyish paytida ehtiyot choralariga qat’iy rioya qilishga chaqirmoqda. Chunki bir lahzali xato nafaqat mol-mulkka, balki inson hayotiga ham katta xavf tug‘dirishi mumkin.
“Zamin”ni Telegramʻda oʻqing!
