Toshkent shahrida ikki avtobus va “Onix” avtomashinasi ishtirokida yo‘l-transport hodisasi ro‘y berdi. Bu haqda “Toshshahartransxizmat” matbuot xizmati xabar qildi.
Hodisa 25-sentyabr kuni soat 10:10 larda Mirzo Ulug‘bek tumani, Mirzo Ulug‘bek ko‘chasida sodir bo‘lgan. Ma’lumotlarga ko‘ra, “King Long” rusumli 63-sonli avtobus oldida harakatlanayotgan “Yutong” rusumli 151-sonli avtobusning orqa qismiga borib urilgan. Sabab — haydovchi oraliq masofani saqlamagan.
“Yutong” avtobusi esa zarba ta’sirida o‘zidan oldin harakatlanayotgan “Onix” yengil mashinasiga borib urilgan. Natijada, 63-sonli avtobusning 46 yoshli yo‘lovchisi qo‘rqib stress holatiga tushgan va tibbiyot muassasasiga yetkazilgan. U yerda unga birinchi yordam ko‘rsatilgan.
To‘qnashuv oqibatida har ikkala avtobus texnik jihatdan shikastlangan. Hodisa bo‘yicha Toshkent shahar IIBB YHXB xodimlari tomonidan rasmiy tartibda hujjatlar rasmiylashtirilgan.
