Paxta yig‘im-terimi mavsumida majburiy mehnatga yo‘l qo‘ygan mansabdorlar ustidan qat’iy choralar qo‘llandi. Bu haqda Kambag‘allikni qisqartirish va bandlik vazirligi xabar berdi.
Ma’lum qilishlaricha, paxta terimi paytida bolalar mehnati va majburiy mehnatni oldini olish, shuningdek, mehnat qonunchiligini buzmaslik maqsadida muntazam monitoring ishlari olib borilmoqda. Joriy yilning 10–20 sentyabr kunlari o‘tkazilgan tekshiruvlarda 300dan ortiq terimchi bilan mavsumiy mehnat shartnomalari tuzishda amaliy yordam ko‘rsatilgan.
Shu davrda 11 holatda mehnat qonunchiligi buzilgani aniqlanib, mansabdor shaxslarga Ma’muriy javobgarlik to‘g‘risidagi kodeksning 49-moddasiga asosan chora ko‘rildi. Shuningdek, majburiy mehnatga yo‘l qo‘ygan 3 nafar mansabdorga 51-modda 1-qismi bo‘yicha ma’muriy chora qo‘llandi.
Vazirlik matbuot xizmatining ta’kidlashicha:
“O‘zbekistonda majburiy mehnatning har qanday shakli qat’iy taqiqlangan va qonun buzuvchilarga nisbatan javobgarlik belgilanishi ta’minlanadi. Terimchilarning huquqlarini himoya qilish va mehnat qonunchiligiga rioya etilishini kuzatish – davlatning ustuvor vazifalaridan biridir”.
Mazkur choralar paxta mavsumida ishchilarning huquqlarini himoya qilish, ijtimoiy adolat va qonun ustuvorligini ta’minlashda muhim ahamiyatga ega bo‘ldi. Terimchilar va qishloq xo‘jaligi sohasidagi xodimlar uchun bunday monitoring tizimi mehnat amaliyotida qonuniylik va xavfsizlikni ta’minlaydi.
“Zamin”ni Telegramʻda oʻqing!
