Andijon viloyatida ayolni shantaj qilish orqali pul talab qilgan erkak qo‘lga olindi. Bu haqda viloyat IIB matbuot xizmati xabar berdi.
Ma’lumotlarga ko‘ra, Shahrixon tumanida yashovchi erkak o‘sha tumanda istiqomat qiluvchi ayol bilan ishqiy munosabatda bo‘lgan. Bir muddatdan so‘ng u ayoldan muayyan miqdorda pul talab qilib, aks holda u bilan yozishgan xabarlar, foto va videolarni ijtimoiy tarmoqlarda tarqatish bilan tahdid qilgan.
Huquqni muhofaza qiluvchi organlar tomonidan tashkil etilgan tezkor tadbirda erkak talab etgan pulni olgan vaqtda qo‘lga olingan. Uning qo‘lidan ashyoviy dalillar — pul va telefon uskunasi olingan.
Tergov ma’lumotlariga ko‘ra, u tovlamachilik orqali ayolni sharmandalik bilan qo‘rqitib, mulkiy manfaat olishni ko‘zlagan. Shu asosda Shahrixon tumani IIB huzurida unga nisbatan O‘zbekiston Respublikasi Jinoyat kodeksining 165-moddasi 1-qismi (tovlamachilik) bo‘yicha jinoyat ishi qo‘zg‘atildi.
Hozirda ayblanuvchiga nisbatan tergov harakatlari olib borilmoqda. Huquqni muhofaza qiluvchi idoralar fuqarolarni shaxsiy hayot bilan bog‘liq ma’lumotlarni ishonchsiz shaxslarga yubormaslik va bunday holatlar yuz berganda darhol huquqni muhofaza organlariga murojaat qilishga chaqirdi.
Shu bilan birga, mutaxassislar ta’kidlamoqda — shantaj va tovlamachilik nafaqat jinoyat, balki shaxsiy daxlsizlikni qo‘pol ravishda buzish hisoblanadi.
“Zamin”ni Telegramʻda oʻqing!
