Toshkent viloyati Yangiyo‘l tumanida yashovchi, 2005 yilda tug‘ilgan fuqaro (initsiali I.Yu.) arzon iPhone sotish bahonasida odamlarni aldab kelgani fosh bo‘ldi, deb xabar berdi Tashkent Today.
Tergovga ko‘ra, u OLX platformasida soxta e’lonlar joylashtirgan va Telegram’da ayollar ismlarida 10 ga yaqin soxta akkaunt ochgan. U turli shaxslar nomidan chiqib, odamlardan arzon iPhone sotish bahonasida oldindan to‘lov olgan va keyin aloqani uzgan.
Uning ushbu usul bilan Nurafshon, Ohangaron, O‘rtachirchiq, Yuqorichirchiq, Buka, Qibray va Toshkent tumanlarida sakkizta o‘xshash jinoyat sodir etgani aniqlangan. Jabrlanuvchilar oddiy odamlar bo‘lib, arzon gadjet olish niyatida bo‘lgan. Yetkazilgan zarar esa katta miqdorda deb baholanmoqda.
Mazkur holat yuzasidan O‘zbekiston Respublikasi JKning 168-moddasi 3-qismi "b" va "g" bandlari (takroran yoki elektron vositalar orqali amalga oshirilgan yirik miqdordagi firibgarlik) bilan jinoyat ishi qo‘zg‘atilgan.
“Zamin”ni Telegramʻda oʻqing!
