Toshkent shahrining Olmazor tumanida 26 oktyabr kuni soat 16:30 larda noodatiy yo‘l-transport hodisasi yuz berdi, deb xabar berdi shahar Yo‘l harakati xavfsizligi boshqarmasi.
Ma’lumotlarga ko‘ra, 2002 yilda tug‘ilgan haydovchi X.A. boshqarayotgan CHAKMAN rusumli yuk mashinasi trellarga ortilgan bir nechta avtomobil bilan harakatlanar ekan, tonnel ostidagi elektron monitorning pastki qismiga urilib tiqilib qolgan.
Hodisa oqibatida hech kim jarohat olmagan. Biroq yuk mashinasi va undagi avtomobillar qisman zarar ko‘rgan.
Ayni paytda, Toshkent shahar IIBB YHXB xodimlari tomonidan hodisa sabablarini aniqlash yuzasidan tekshiruv ishlari olib borilmoqda.
Mutaxassislar haydovchilarga yo‘ldagi balandlik cheklovlariga qat’iy rioya qilish zarurligini, ayniqsa yirik yuk mashinalari bilan tonnel va ko‘priklardan o‘tishda ehtiyotkor bo‘lish lozimligini eslatmoqda.
“Zamin”ni Telegramʻda oʻqing!
