Navoiy viloyati Zarafshon shahrida ro‘y bergan noxush hodisa keng jamoatchilikni xavotirga soldi — 3 yoshli qizaloq ovqat tayyorlanayotgan paytda qo‘lini go‘sht maydalagich ichiga tushirib yuborgan va barmoqlari metall qurilma ichida qisilib ketgan.
Ona vaqtincha bola hushidan ketmasdan qurilmani darhol o‘chirgan, biroq barmoqlar temir konstruktsiya ichida qattiq siqilib qolgani uchun u qurilmani sindira olmagan. Ayol shu zahoti tez yordam chaqirgan.
Tibbiyot xodimlari 12 daqiqa ichida yetib kelib, jarohat yanada og‘irlashmasligi uchun bolani maydalagich bilan birga shifoxonaga olib borishga majbur bo‘lishgan.
Zarafshon shahar tibbiyot birlashmasi travmatologi Elmurod Ahatovning aytishicha, qizaloq shifoxonaga og‘riq shoki holatida keltirilgan va chap qo‘lida kuchli qon ketishi kuzatilgan. Barmoqlar va kaft qismida chuqur shikastlanishlar aniqlangan.
Shifokorlar 2 soatdan ortiq davom etgan murakkab operatsiya paytida barmoq paylari, nerv tolalari va qon tomirlarini tiklab berishga harakat qilishgan. Ahatovning ta’kidlashicha, bu yoshdagi bolalarda tomirlar juda nozik bo‘lgani uchun jarrohlik yuqori aniqlik talab etgan.
Dastlab shifokorlar qo‘lni saqlab qolish imkoniyatini 50 foizdan past baholashgan. Jarohat chuqurligi va tomirlar shikastlangani sabab destruktsiya xavfi yuqori bo‘lgan.
Ayni paytda qizaloqning ahvoli barqaror. U ba’zi funksiyalarni tiklash uchun kamida 2–3 oy davolanadi, to‘liq motor harakatlari esa 6 oygacha tiklanishi mumkin.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
