Shayxontohurdagi ikki qavatli binoda yong‘in chiqdi

Toshkentning Shayxontohur tumanida joylashgan ikki qavatli binoda kutilmaganda yong‘in kuzatildi. Hodisa 26 noyabr kuni soat 14:54 da qayd etilgani haqida shahar FVB ma’lum qildi.

Chaqiruvdan so‘ng, 4 ta yong‘in-qutqaruv bo‘linmasi 15:03 da hodisa joyiga yetib borgan. Qutqaruvchilar yong‘inni 15:09 da o‘rab olgan va 15:15 da to‘liq bartaraf etgan.

Olov taxminan 100 kvadrat metr maydonga zarar yetkazgan — binoning tom qismi va ichki qismlari yonib jabrlangan. Ammo yong‘in-o‘chiruvchilarning tezkor va professional harakatlari tufayli yong‘in yanada kengayishiga yo‘l qo‘yilmagan.

Hozirda yong‘inning kelib chiqish sabablari va zarar miqdori o‘rganilmoqda. Tan jarohati olganlar haqida ma’lumotlar kelmagan.