Samarqand aeroportida yo‘lovchi yukidan pnevmatik to‘pponcha chiqdi

Samarqand aeroportida Rossiyadan kelgan reys yo‘lovchisining yukidan pnevmatik to‘pponcha va o‘q-dorilar topildi. Voqea 4 dekabr kuni “Sankt-Peterburg–Samarqand” yo‘nalishi bo‘yicha amalga oshgan reysda qayd etilgan.

39 yoshli O‘zbekiston fuqarosi A.D. bojxonadan o‘tishda “yashil” yo‘lakni tanlagan, biroq xizmatchilarda shubha tug‘ilgani uchun u “qizil” yo‘lakka o‘tkazilib, bagajlari to‘liq ko‘zdan kechirildi. Tekshiruv jarayonida uning sumkasidan 1 dona pnevmatik to‘pponcha, 4 ta siqilgan havo ballonchasi va 105 ta o‘q chiqdi.

Fuqaro qurolni Sankt-Peterburgda notanish shaxsdan satip olganini va shaxsiy maqsadda olib kelayotganini aytgan. Hozircha to‘pponcha va o‘q-dorilar bojxona tomonidan vaqtincha saqlovga olingan.