Telegram'da oxirgi oylarda yangi turdagi firibgarlik keskin ko‘paygani haqida UZCERT ogohlantirdi. Ma’lum qilinishicha, firibgarlar Telegram-guruhlaridagi ochiq @username ma’lumotlarini kuzatib, guruhga qo‘shilmasdan turib foydalanuvchilar profillarini to‘liq nusxalamoqda. Ular surat, ism-familiya, bio va hatto @username'ni ham ayni shaklda qaytarib yaratadi.
Shundan keyin firibgarlar nusxalangan profil orqali guruh a’zolariga shaxsiy xabar yullab, “shoshilinch pul kerak”, “qarz berib turing” kabi bahonalar bilan begona bank kartalariga pul o‘tkazishni so‘raydi. Taniqli odamdan kelgandek ko‘ringani uchun ayrimlar vaziyatni tekshirmasdan mablag‘ yuborib, moliyaviy talafotga uchrayapti.
UZCERT foydalanuvchilarga bir qator xavfsizlik choralarini eslatdi:
– Telegram hisobini 2FA orqali mustahkamlash;
– telefon raqami, rasm va “last seen” ma’lumotlarini begona odamlardan yashirish;
– noma’lum akkauntlardan kelgan pul so‘rash yoki “yutuq” xabarlariga ishonmaslik;
– o‘sha odamga pul yuborishdan oldin unga aloqada tasdiqlab olish;
– apk/exe kabi fayllarni ochishdan oldin manbasini tekshirish;
– aktiv sessiyalarni muntazam ko‘rib chiqib, tushunarsiz qurilmalarni o‘chirish.
Muttaxassislar ta’kidlamoqda: firibgarlikning bu turi tez yoyilmoqda, ehtiyot choralarini qo‘llash esa har bir foydalanuvchining shaxsiy xavfsizligini ta’minlaydi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
