Bo‘ridan qo‘ylarini qutqardi, ekologiya esa jarima qo‘lladi

Surxondaryo viloyatida qo‘ylariga hujum qilgan bo‘rini o‘ldirgan fuqaro ma’muriy javobgarlikka tortildi. Bu haqda Ekologiya va iqlim o‘zgarishlari bo‘yicha hududiy bosh boshqarma ma’lum qildi.

Ma’lum qilinishicha, holat 2025 yil 10 dekabr kuni Uzun tumaniga qarashli “Beshkapa” mahallasi hududida sodir bo‘lgan. Fuqaro M.I. o‘z qaramog‘idagi mayda shoxli chorva — qo‘ylarni adirlik hududda o‘tlatib yurgan paytda bo‘ri hujumiga duch kelgan.

Qayd etilishicha, yirtqich hayvon chorvaga tashlanganidan so‘ng, fuqaro mollarni saqlab qolish va himoya qilish maqsadida bo‘rini ta’qib qilgan. Natijada bo‘ri nobud bo‘lgan. Mazkur holat yuzasidan fuqaro o‘z tushuntirish xatida aynan qo‘ylarni asrash uchun harakat qilganini bildirgan.

Biroq tekshiruv jarayonida fuqaroning ushbu harakatlari O‘zbekiston Respublikasining “Hayvonot dunyosini muhofaza qilish va undan foydalanish to‘g‘risida”gi qonunining 33-moddasi talablariga zid ekani aniqlangan.

Natijada, fuqaro M.I.ga nisbatan Ma’muriy javobgarlik to‘g‘risidagi kodeksning tegishli moddasiga asosan bazaviy hisoblash miqdorining 20 barobari miqdorida, ya’ni 8 million 240 ming so‘m jarima jazosi qo‘llandi.

Ma’lumot o‘rnida, avvalroq Toshkent viloyati Yangiyo‘l tumanida ham fuqarolar tomonidan hayvonlarga nisbatan qonunbuzarlik holatlari aniqlangani haqida xabar berilgan edi.