O'zbekistonda ayollar va bolalarga nisbatan zo'ravonlik uchun javobgarlik keskin kuchaytirilishi rejalashtirilmoqda. Asosiy o'zgarishlardan biri — voyaga yetmaganlarga qarshi sodir etilgan jinsiy jinoyatlar uchun umrbod ozodlikdan mahrum etish jazosini joriy etish. Bu haqda podrobno.uz xabar beradi.
Bu tashabbuslar “Mahalla rivoji va jamiyat taraqqiyoti yili” dasturi hamda “O'zbekiston – 2030” strategiyasini amalga oshirish bo'yicha davlat dasturi loyihalarida qayd etilgan. Hujjatlarda voyaga yetmaganlarga nisbatan jinsiy va boshqa ko'rinishdagi zo'ravonlik bilan bog'liq jinoyatlarni tergov qilish prokuratura organlarining mutlaq vakolatiga o'tkazilishi ko'zda tutilgan.
Bunday ishlarni yuritish uchun maxsus tayyorlangan tergovchilar va sudyalar institutini shakllantirish ham rejalashtirilgan. Shuningdek, nikoh yoshiga yetmagan shaxslarni unashtirishga yo'l qo'ygan ota-onalar yoki vasiylarga, shuningdek noqonuniy nikohlarni targ'ib qilganlarga nisbatan ma'muriy javobgarlik belgilash taklif etilmoqda.
Oilaviy zo'ravonlikning oldini olish maqsadida yangi turmush qurganlar uchun mo'ljallangan maxsus ta'lim dasturlari kengaytiriladi va kuchaytiriladi — ularga psixolog hamda yuristlar jalb etilishi ko'zda tutilgan. Ushbu normalar 2026 yil 1 aprelidan kuchga kirishi rejalashtirilmoqda.
Avvalroq Oliy Majlis Qonunchilik palatasi deputati Dilnoza Azizova bolalarga nisbatan jinsiy zo'ravonlikning barcha ko'rinishlari uchun umrbod qamoq jazosini belgilash tashabbusini ilgari surgandi. Bunga Namangan viloyatida erkak kishi 7 yoshli qarindoshini zo'rlagani haqidagi holat sabab bo'lgani aytiladi. Ma'lumotlarga ko'ra, u avval ham bir necha bor turli jinoyatlar, jumladan zo'rlash va zo'ravonlik bilan jinsiy ehtiyojni g'ayritabiiy usulda qondirish kabi jinoyatlar uchun sudlangan.
“Zamin”ni Telegramʻda oʻqing!
