2026 yilda Navoiy davlat universiteti negizida Sejong instituti (King Sejong Institute) faoliyati yoʻlga qoʻyiladi. Yangi markaz Oʻzbekistonda koreys tilini oʻqitish hamda koreys madaniyatini keng targʻib qilish bilan shugʻullanadi. Bu haqda podrobno.uz xabar beradi.
Institutning asosiy vazifalari qatorida Oʻzbekiston va Koreya oʻrtasidagi akademik almashinuvni kengaytirish, shuningdek talaba va oʻqituvchilar uchun yangi xalqaro imkoniyatlar yaratish ham bor. Bu boradagi kelishuv Navoiy davlat universiteti rektori Muhiddin Kalonov va Janubiy Koreyadagi Calvin universiteti rektori Hvan Kun Yon uchrashuvida erishildi.
Tomonlar hamkorlikning muhim yoʻnalishlarini qamrab olgan oʻzaro anglashuv memorandumi va hamkorlik bitimini imzoladi. Hujjatlarda qoʻshma ilmiy tadqiqotlar oʻtkazish, professor-oʻqituvchilar hamda talabalar almashinuvini yoʻlga qoʻyish, xalqaro konferensiya va seminarlar tashkil etish, shuningdek oʻquv-uslubiy va ilmiy materiallar bilan oʻzaro almashish kabi rejalarga urgʻu berilgan.
Maʼlumot uchun: Sejong instituti — Koreya Respublikasi hukumati ko‘magida yo‘lga qo‘yilgan xalqaro taʼlim markazlari tarmog‘i. U koreys alifbosi hangul yaratilishi bilan bogʻlanadigan Sejong Buyuk nomi bilan ataladi va dunyoning turli mamlakatlarida universitetlar hamda taʼlim muassasalari bazasida faoliyat yuritadi.
Ushbu institutlarda koreys tili turli darajalarda oʻqitiladi, Koreya tarixi, anʼanalari va madaniyati bo‘yicha bilimlar targʻib qilinadi, akademik hamda madaniy almashinuv rivojlantiriladi, xalqaro taʼlim hamkorligiga ko‘mak beriladi.
“Zamin”ni Telegramʻda oʻqing!
