Guliston shahrida tadbirkorning suv ta’minoti bo‘yicha 17 mln so‘mlik qarzdorligini “yo‘q qilib beraman” deya va’da bergan mutaxassis qo‘lga olindi. Holat tadbirkorlik subyektlarining huquqlarini himoya qilish doirasida o‘tkazilgan tezkor tadbir jarayonida fosh etildi.
Ma’lum qilinishicha, Bosh prokuratura huzuridagi Departamentning Guliston shahri bo‘limi xodimlari o‘tkazgan tadbirda “S.I.T.” MCHJning bo‘lim mutaxassisi E.V. yakka tartibdagi tadbirkor A.R.ning ishlab chiqarish sexida suv ta’minotidan yig‘ilib qolgan 17 mln so‘m qarzni “bekor qilib berish”, qo‘shimcha ravishda yangi hisoblagich o‘rnatishni va’da qilgan.
Aytilishicha, u bu “masalani hal qilib berish” evaziga MCHJ xodimi Q.J. orqali 4,5 mln so‘m pul mablag‘ini olgan paytida ashyoviy dalillar bilan ushlangan.
Huquqni muhofaza qiluvchi idoralar ma’lumotiga ko‘ra, mazkur holat yuzasidan Jinoyat kodeksining 168-moddasi (firibgarlik) hamda 28 va 211-moddalari (pora berish bilan bog‘liq normalar) asosida jinoyat ishi qo‘zg‘atilgan. Hozirda ish doirasida tergov harakatlari olib borilmoqda.
Bu kabi holatlar tadbirkorlar uchun yana bir ogohlik: “qarzni o‘chirib beramiz”, “hisoblagichni oson hal qilamiz” degan va’dalar qanchalik shirin tuyulmasin, qonuniy yo‘ldan chiqish oxirida muammoni yanada kattalashtirishi mumkin.
