Toshkentda 10-sinf o‘quvchisi urib yuborgan YPX xodimi fojiali halok bo‘ldi

Poytaxtda sodir bo‘lgan yo‘l-transport hodisasi og‘ir oqibat bilan yakunlandi. Xizmat vazifasini bajarayotgan YPX inspektori kichik serjant Xosilbek Eshnazarov shifokorlar sa’y-harakatlariga qaramasdan vafot etdi.

Ma’lum qilinishicha, 25 fevral kuni soat 21:48 larda Toshkent shahrida xizmat olib borayotgan inspektorni voyaga yetmagan, 10-sinf o‘quvchisi boshqaruvidagi “BMW” rusumli avtomashina urib yuborgan. Oqibatda u og‘ir tan jarohatlari olgan va uch kun davomida tibbiyot muassasasida shifokorlar nazoratida bo‘lgan. Biroq ko‘rsatilgan muolajalar samara bermagan.

Ichki ishlar vazirligi marhumning vafoti munosabati bilan rasmiy bayonot berib, uning oila a’zolari va yaqinlariga chuqur hamdardlik bildirdi. Shuningdek, Bosh prokuratura ham ta’ziya izhor etgan.

Xosilbek Eshnazarov 2022 yildan buyon ichki ishlar organlarida xizmat qilib kelayotgan edi. Xizmatga sadoqati va fidoyiligi bilan ajralib turgan xodimning ortidan qariya ota-onasi, rafiqasi hamda ikki o‘g‘il va bir qiz farzandi qoldi.

Ushbu voqea jamoatchilikda katta aks-sado berdi. Yo‘l harakati xavfsizligi, voyaga yetmaganlarning transport boshqarishi va mas’uliyat masalalari yana bir bor dolzarb mavzuga aylandi.