Toshkent viloyati Nurafshon shahrida 2 mart kuni bankomatni buzib, ichidagi pullarni olib ketishga uringan shaxs tezkor ravishda qo‘lga olindi. Bu haqda viloyat Ichki ishlar bosh boshqarmasi axborot xizmati ma’lum qildi.
Xabarga ko‘ra, tungi soat 03:10 da “Oppoq” MFY, Toshkent yo‘li ko‘chasidagi bankomat qurilmasidan xavf signalini bergan tashvish xabari Qo‘riqlash boshqarmasiga kelib tushgan. Ogohlantirish navbatchilik qismi orqali darhol tungi tezkor guruhga uzatilgan.
Xodimlar voqea joyiga bor-yo‘g‘i 4 daqiqada yetib borib, atrof-muhitni tekshirishga kirishgan. Kuzatuv va tekshiruv davomida bank shoxobchasi hududida bo‘lgan shaxs ushlangan.
Uning yonidan bolg‘a, otvertka hamda boshqa xo‘jalik asbob-uskunalari topilgan. Dastlabki ma’lumotlarga ko‘ra, u bankomat eshigini majburan ochib, pullarni o‘g‘irlashni rejalashtirgan.
Tezkor chora-tadbirlar natijasida O‘rta Chirchiq tumanida yashovchi, 1994 yilda tug‘ilgan fuqaro voqea joyidayoq qo‘lga olingan. Ayni holat yuzasidan hududiy IIB tomonidan tergovga qadar tekshiruv ishlari olib borilmoqda.
“Zamin”ni Telegramʻda oʻqing!
