Prezident Shavkat Mirziyoyev imzolagan farmonga binoan Toshkent shahar IIBB Yo‘l harakati xavfsizligi boshqarmasiga qarashli yo‘l-patrul xizmati inspektori, marhum kichik serjant Hosilbek Eshnazarov "Jasorat" medali bilan mukofotlandi.
Rasmiy hujjatda u ichki ishlar tizimidagi sidqidildan mehnati, jinoyatchilikka qarshi kurashdagi faol ishtiroki hamda jamoat xavfsizligini ta’minlash yo‘lidagi xizmatlari uchun munosib taqdirlangani qayd etilgan. Shuningdek, yo‘llarda harakat xavfsizligini mustahkamlash, YTHlarning oldini olish va qoidabuzarliklarning profilaktikasini samarali tashkil etishga qo‘shgan hissasi alohida e’tirof etilgan.
Eslatib o‘tish joiz, 25-fevral kuni soat 21:48 larda Toshkent shahrida xizmat vazifasini bajarayotgan paytda Hosilbek Eshnazarovni "BMW" rusumli avtomashina urib yuborgan. Tezkor ma’lumotlarga ko‘ra, transport vositasini 10-sinfda o‘qiydigan, voyaga yetmagan shaxs boshqargan.
Og‘ir jarohat olgan inspektor uch kun mobaynida shifokorlar nazoratida davolangan, ammo ko‘rilgan tibbiy choralarga qaramasdan hayotdan ko‘z yumgan. Ma’lumotlarga ko‘ra, Hosilbek Eshnazarov 2022-yildan buyon ichki ishlar organlarida xizmat qilib kelgan. Uning ortidan ota-onasi, rafiqasi, ikki nafar o‘g‘li va bir nafar qizi qolgan.
“Zamin”ni Telegramʻda oʻqing!
