Qashqadaryo viloyatining Koson tumanida favqulodda holat yuz berdi. Bugun soat 10:30 atrofida Yangiobod mahallasida to'xtab turgan Damas rusumli avtomobilning gaz balloni to'satdan portlab ketdi. Hodisa aks etgan videolar ijtimoiy tarmoqlarda keng tarqalib, jamoatchilik orasida xavotir uyg'otdi.
Favqulodda vaziyatlar vazirligi ma'lumotlariga ko'ra, portlashga avtomobilga o'rnatilgan gaz ballonining texnik nosozligi sabab bo'lgan. Videolavhalarda ballon bo'laklari portlash kuchi bilan atrofdagi boshqa transport vositalari ustiga sochilib ketganini ko'rish mumkin. Baxtli tasodif tufayli ushbu hodisa oqibatida hech kim tan jarohati olmagan va yong'in kelib chiqmagan.
Hozirgi vaqtda mutaxassislar tomonidan voqea joyi ko'zdan kechirilib, yetkazilgan moddiy zarar miqdori aniqlanmoqda. Shuningdek, texnik nosozlikka nima sabab bo'lgani va ballon qachon oxirgi marta tekshiruvdan o'tgani yuzasidan surishtiruv ishlari olib borilmoqda. Haydovchilardan o'z transport vositalaridagi gaz uskunalarini o'z vaqtida va sifatli texnik ko'rikdan o'tkazishni so'raymiz.
“Zamin”ni Telegramʻda oʻqing!
