Surxondaryo viloyatida mavjud bo‘lmagan “Cobalt” avtomobilini sotish bahonasida bir necha fuqarolarni aldab, pul o‘zlashtirgan shaxs qo‘lga olindi.
Ma’lum bo‘lishicha, Qumqo‘rg‘on tumanida yashovchi 27 yoshli yigit Telegram messenjerida soxta profil ochib, turli guruh va kanallarda “Cobalt” avtomobili sotilishi haqida e’lonlar joylashtirgan. U xaridorlarni jalb qilish maqsadida mashina narxini bozor bahosidan ancha arzon qilib ko‘rsatgan.
Gumonlanuvchi xaridorlar bilan yozishmalar davomida ularga avtomobilga yangi shinalar qo‘yish kerakligini aytib, oldindan pul o‘tkazishni so‘ragan. Fuqarolar pul yuborgach esa, u yozishmalarni o‘chirib tashlab, aloqani uzgan.
Tergov harakatlari davomida ushbu shaxs Surxondaryo viloyatining Oltinsoy tumanida yashovchi uch nafar fuqaroga jami 8 million so‘mdan ortiq moddiy zarar yetkazgani aniqlangan. Umumiy hisobda esa u 15 nafar fuqaroning ishonchiga kirib, ularning pul mablag‘larini o‘zlashtirgani ma’lum bo‘ldi.
Hozirda gumonlanuvchiga nisbatan O‘zbekiston Respublikasi Jinoyat kodeksining 168-moddasi 3-qismi (firibgarlik) bilan jinoyat ishi qo‘zg‘atilgan. Sud qarori bilan unga qamoqqa olish ehtiyot chorasi qo‘llanilgan.
“Zamin”ni Telegramʻda oʻqing!
