“O‘zbekiston metallurgiya kombinati” AJga 2024 yil oktyabridan 2025 yil avgustgacha rahbarlik qilgan Dilshod Ahmedov Interpol tomonidan xalqaro qidiruvga berildi. Unga nisbatan o‘zlashtirish yoki rastrata yo‘li bilan davlat mablag‘larini talon-toroj qilish bo‘yicha gumon bildirilmoqda.
Maʼlumotlarga ko‘ra, Dilshod Tursunqulovich Ahmedovning ismi Interpol bazasida rasman eʼlon qilingan. U 1972 yilda tug‘ilgan bo‘lib, Jinoyat kodeksining 167-moddasi — yaʼni mol-mulkni o‘zlashtirish yoki ishonchni suiisteʼmol qilish orqali talon-toroj qilish jinoyatida gumon qilinmoqda.
Hozircha O‘zbekistonning huquqni muhofaza qiluvchi idoralari tomonidan unga nisbatan ochilgan jinoyat ishi, shuningdek, yetkazilgan zarar miqdori yuzasidan rasmiy izoh berilmagan.
Ahmedov mehnat faoliyati davomida turli masʼuliyatli lavozimlarda ishlagan: 2021 yildan “O‘zmetkombinat” raisining birinchi o‘rinbosari, 2024 yil yanvardan esa Investitsiyalar, sanoat va savdo vaziri o‘rinbosari bo‘lib faoliyat yuritgan.
Keyinchalik, 2024 yil oktyabrda u “O‘zbekiston metallurgiya kombinati” AJ rahbari etib tayinlangan, 2025 yil avgustda esa lavozimdan ozod etilgan va uning o‘rnini Bahodir Abdullayev egallagan.
Hodisa atrofidagi tergov jarayonlari davom etmoqda, ishning keyingi tafsilotlari esa rasmiy bayonotlar orqali maʼlum qilinadi.
“Zamin”ni Telegramʻda oʻqing!
