Qashqadaryo viloyatining Ko‘kdala tumanida tabiatga nisbatan noqonuniy harakat sodir etilgan holat qayd etildi. Bir guruh fuqarolar lolazor hududini avtomobilda bosib o‘tgani aniqlandi.
Mazkur voqea Ekologiya va iqlim o‘zgarishi boshqarmasi hamda Ichki ishlar organlari tomonidan o‘rganib chiqildi. Tekshiruvlar davomida huquqbuzarlikka yo‘l qo‘ygan shaxslar belgilangan tartibda aniqlandi va ularning transport vositalari jarima maydonchasiga joylashtirildi.
Rasmiy hisob-kitoblarga ko‘ra, tabiatga yetkazilgan zarar miqdori 6 million 592 ming so‘mni tashkil etgan. Shu bilan birga, uch nafar huquqbuzarning har biriga bazaviy hisoblash miqdorining 50 baravari, ya’ni 20 million 600 ming so‘mdan jarima belgilangan. Jami jarima summasi 61 million 800 ming so‘mni tashkil qiladi.
Qayd etilishicha, huquqbuzarlar yetkazilgan zararni ham, jarimani ham to‘liq qoplashi shart qilib belgilangan.
Ekologiya qo‘mitasi aholiga tabiatga ehtiyotkorona munosabatda bo‘lish, o‘simliklar va yashil hududlarni asrab-avaylash muhim ekanini eslatdi. Mutaxassislar ta’kidlashicha, tabiatga yetkazilgan har qanday zarar qonun doirasida jiddiy javobgarlikka sabab bo‘ladi.
“Zamin”ni Telegramʻda oʻqing!
