Urbanizatsiya va uy-joy bozorini barqaror rivojlantirish milliy qo‘mitasi raisi Sherzod Kudbiyev tadbirkorlar bilan uchrashuv chog‘ida taqqan qimmatbaho soati ortidan kelib chiqqan muhokamalarga munosabat bildirdi.
Ijtimoiy tarmoqlarda foydalanuvchilar ushbu soatni lyuks segmentga mansub model, ehtimol Vacheron Constantin Overseas yoki Breguet Marine ekani va uning narxi taxminan 50 ming dollar atrofida bo‘lishi mumkinligini muhokama qilishgan.
Shu bilan birga, jurnalist Ilyos Safarov davlat xizmatchilari mulkiga jamoatchilik eʼtibori qaratilishi ochiq jamiyat uchun tabiiy holat ekanini taʼkidlab, bu kabi vaziyatlarda rasmiylarning javobsiz qolishi ishonch masalasiga salbiy taʼsir ko‘rsatishini qayd etgan.
Ayrim taxminlarga ko‘ra, mazkur soat Kudbiyevga 2024 yil dekabr oyida vafot etgan otasi Davlat Kudbiyevdan meros sifatida qolgan bo‘lishi mumkinligi ham aytilgan.
19 aprel kuni Sherzod Kudbiyev videomurojaat orqali izoh berib, kechikish sababini ish hajmining ko‘pligi va bosimli vaziyat bilan bog‘ladi.
— Ilyos aka Safarov tomonidan bildirilgan fikr va tanqidni ko‘rdim. Menimcha, bu o‘rinli mulohaza bo‘ldi. Bu soat men uchun juda qadrli, u ko‘p xotiralarni eslatadi. Ammo har qanday holatda ham davlat xizmatchisi kamtar bo‘lishi shart, — dedi u.
Kudbiyev, shuningdek, ommaviy tadbirlar va rasmiy uchrashuvlarda davlat xizmatchilari kasbiy odob va etika qoidalariga qatʼiy rioya qilishi lozimligini taʼkidladi hamda bu holat unga saboq bo‘lganini bildirdi.
— Bunday yig‘ilishlarda, uchrashuvlarda xizmatchi sifatida kamtarlikni saqlash va o‘z masʼuliyatini to‘g‘ri anglash juda muhim. Bu men uchun katta xulosa bo‘ldi. Kelgusida faqat vatan ravnaqi uchun halol xizmat qilishni davom ettiramiz, — deya so‘zini yakunladi u.
Qisqasi, ushbu holat jamoatchilik va davlat xizmatchilari o‘rtasida shaffoflik, odob va ishonch masalalarini yana bir bor kun tartibiga olib chiqdi.
“Zamin”ni Telegramʻda oʻqing!
