Fargʻonada alimentdan qochib ayoli va qizini oʻldirgan erkak 19 yilga qamaldi

Fargʻona viloyatida jamoatchilikni larzaga solgan mudhish jinoyat yuzasidan sud hukmi eʼlon qilindi. Oʻzbekiston tumanida erkak aliment toʻlamaslik maqsadida oʻz turmush oʻrtogʻi va kichik yoshli farzandini hayotdan mahrum etgani uchun uzoq muddatga qamaldi.

Maʼlum boʻlishicha, 2025 yil 3 noyabr kuni mast holatda qaynotasining uyiga kelgan fuqaro ayoli bilan uchrashgan. Ilgari ayol aliment undirish boʻyicha sudga murojaat qilgan va sud qaroriga koʻra erkak 15 sutkaga qamalgan edi.

Jazoni oʻtab chiqqanidan keyin ham oilaviy nizo barham topmagan, aksincha, yanada keskinlashgan. Tergov maʼlumotlariga koʻra, u aliment toʻlashdan qutulish niyatida oldindan tayyorlab kelgan oshxona pichogʻi bilan ayoliga bir necha bor zarba bergan. Fojiali holat shundaki, u 3 yoshli qizchasini ham ayamagan.

Olingan jarohatlar oqibatida bola voqea joyidayoq vafot etgan, onasi esa shifoxonaga olib ketilayotgan vaqtda hayotdan koʻz yumgan. Jinoyatni sodir etgan shaxs voqeadan soʻng qochib ketgan, ammo keyinchalik qoʻlga olingan.

Jinoyat ishlari boʻyicha sud uni Jinoyat kodeksining tegishli moddalari bilan aybdor deb topib, 19 yil muddatga ozodlikdan mahrum qildi.

Ushbu fojia oilaviy mojarolarni vaqtida hal etmaslik qanday ogʻir oqibatlarga olib kelishi mumkinligini yana bir bor koʻrsatdi.