Navoiy viloyatining Nurota tumanida og‘ir yo‘l-transport hodisasi sodir bo‘lib, u fojiaviy oqibatlarga olib keldi. Dastlabki ma’lumotlarga ko‘ra, oilaviy bog‘cha rahbari bo‘lgan ayol 13 nafar bolani Matiz rusumli avtomashinada bog‘chaga olib ketayotgan vaqtda avtohalokatga uchragan.
Hodisa oqibatida transport vositasini boshqarib kelgan ayol voqea joyida halok bo‘lgan. Mashinada bo‘lgan bolalardan biri og‘ir ahvolda — koma holatiga tushgan, yana 8 nafari esa turli darajadagi jarohatlar bilan viloyat markazidagi shifoxonaga yetkazilgan. Qolgan bolalarning holati bo‘yicha qo‘shimcha ma’lumotlar aniqlashtirilmoqda.
Ma’lum qilinishicha, ushbu ayol hamda uning turmush o‘rtog‘i uzoq yillar davomida haydovchilik guvohnomasisiz avtomobil boshqarib kelgan. Bu holat esa voqea yuzasidan jiddiy savollarni keltirib chiqarmoqda.
Mutasaddi organlar tomonidan hodisa sabablari o‘rganilmoqda. Dastlabki taxminlarga ko‘ra, yo‘l harakati qoidalariga rioya qilinmagani va xavfsizlik choralarining yetarli darajada ta’minlanmagani fojianing asosiy omillaridan biri bo‘lishi mumkin.
