Farg‘onada o‘g‘il pul uchun o‘z onasini o‘ldirdi
Farg‘ona viloyatida 29 yoshli erkak pul yuzasidan kelib chiqqan janjal oqibatida o‘z onasini bolta va pichoq bilan shafqatsizlarcha o‘ldirdi. Jinoyatni sodir etgach, izini yashirish maqsadida jasadning ayrim qismlarini xonadon hududiga ko‘mib qo‘yib, voqea joyidan qochib ketdi. Mazkur holat yuzasidan Jinoyat ishlari bo‘yicha Dang‘ara tuman sudi tomonidan hukm chiqarildi.
Farg‘ona viloyatida sodir bo‘lgan mudhish jinoyat jamoatchilikni larzaga soldi. Ma’lum bo‘lishicha, 29 yoshli erkak pul masalasida chiqqan janjal ortidan o‘z onasini shafqatsizlarcha o‘ldirgan.
Sud materiallariga ko‘ra, voqea kuni ertalab soat 08:00 atrofida marhuma ayol va uning to‘ng‘ich o‘g‘li o‘rtasida moliyaviy muammo sabab tortishuv yuzaga kelgan. Janjal keskin tus olib, ayblanuvchi qo‘lidagi bolta bilan onasining bosh qismiga bir necha bor zarba bergan.
Ma’lumotlarda qayd etilishicha, u shundan so‘ng jinoiy harakatini davom ettirib, hovlida turgan xo‘jalik pichog‘ini olgan va ayolning jasadiga nisbatan shafqatsiz munosabatda bo‘lgan. Keyin esa izini yashirish maqsadida jasadning ayrim qismlarini xonadon hududiga ko‘mib qo‘ygan va voqea joyidan qochib ketgan.
Mazkur holat Jinoyat ishlari bo‘yicha Dang‘ara tuman sudida ko‘rib chiqildi. Sud ayblanuvchini Jinoyat kodeksining qasddan odam o‘ldirishga oid moddasi bilan aybdor deb topdi.
Hukmga ko‘ra, u 18 yil muddatga ozodlikdan mahrum qilinib, jazoni umumiy tartibdagi koloniyada o‘tashi belgilandi.
Izohlar 0
…