Toshkent shahrida kichik yoshli bola ishtirokidagi qiziqarli, ammo xavfli holat ijtimoiy tarmoqlarda muhokamalarga sabab bo‘lmoqda. Voyaga yetmagan bola o‘yinchoq avtomobilda katta yo‘lga chiqib, haqiqiy avtomashinalar orasida harakatlangan.
Poytaxt Yo‘l harakati xavfsizligi boshqarmasi ma’lumotiga ko‘ra, voqea 8 may kuni soat 12:30 atrofida Bektemir tumanidagi Oltintopgan ko‘chasida sodir bo‘lgan. Ota-ona nazoratidan chetda qolgan bola elektrda harakatlanuvchi o‘yinchoq mashinasida yo‘lning qatnov qismiga chiqib ketgan.
Holat atrofdagilar va boshqa haydovchilar uchun xavfli vaziyatni yuzaga keltirgan. YHXB xodimlari tomonidan bolaning xavfsizligi ta’minlanib, uning ota-onasiga tegishli tushuntirish berilgan.
Shuningdek, bolaning otasiga nisbatan Ma’muriy javobgarlik to‘g‘risidagi kodeksning 47-moddasi — bolalarni tarbiyalash va nazorat qilish bo‘yicha majburiyatlarni bajarmaslik holati yuzasidan ma’muriy bayonnoma rasmiylashtirilgan.
Mazkur voqea ijtimoiy tarmoqlarda turli muhokamalarga sabab bo‘lib, ko‘pchilik ota-onalarni farzandlar xavfsizligiga jiddiy e’tibor qaratishga chaqirmoqda.
