«O‘zstandart» 8 tonnali oshga sertifikat berdi

8 sentyabr, juma kuni “Oʻzbegim” Milliy qadriyatlar festivali doirasida Toshkentda dunyodagi eng katta palov tayyorlanadi. Palovning miqdori 8 tonnaga yaqin bo‘lishi va u “Ginnessning rekordlar kitobi”ga kiritilishi rejalashtirilgan.

Ayni paytda rekord o‘rnatishga tayyorgarlik davom etmoqda. O‘zbekiston standartlashtirish, metrologiya va sertifikatlashtirish agentligi («O‘zstandart» agentligi) mutaxassislari o‘lchov asboblarini barcha zarur sinovlardan o‘tkazdi va bu asboblarga 2017 yilning 16 avgustida 1890-raqamli muvofiqlik sertifikati berildi. Bu haqda agentlikning Facebook’dagi sahifasi orqali ma’lum qilindi.

Boshqa rekordlarda bo‘lgani singari, festivalda Guinness World Records’ning rekordlarni qayd etuvchi maxsus komissiyasi ishtirok etib, rekord o‘rnatish uchun zarur barcha mezon va shartlarning bajarilishini kuzatib boradi. Uning asosiy shartlaridan biri ovqatning og‘irligini qayd etuvchi, sertifikatsiyadan o‘tgan tarozilarning bo‘lishidir.

Shunday qilib, rekord o‘rnatish uchun hamma narsa tayyor.

Manba: Uz24.uz