Onaxon Haj uchun yiqqan puliga mahallasiga suv chiqartirib berdi

Fargʻona viloyati Uchkoʻprik tumanilik 81 yoshli Zebuniso ona Ahmedova haj ziyorati uchun yillar davomida jamgʻargan 50 million soʻmdan ortiq mablagʻiga oʻzi yashayotgan Yangiobod mahallasi aholisi uchun toza ichimlik suvi chiqartirib berdi. Bu haqda “Xalq soʻzi”ga tayanib Kun.uz yozmoqda.

— Dinimiz arkonlariga koʻra, haj ziyoratiga borgan odamning oilasida ehtiyoji va qarzi yoʻq, toʻq va toʻkin boʻlishi kerak ekan, — deydi Zebuniso aya. — Mahallam ham mening oilam. Ular qishning sovuq, yozning jazirama kunlarida uch chaqirim naridan suv tashib kelishayotganda, men qanday qilib bemalol haj ziyoratiga boraman. Yosh kelinlarimizning qiynalayotganligini koʻrsam yuragim ezilib ketadi. Toʻgʻrisi, buni oʻzimga qabul qila olmadim.

Yangiobod mahallasida avvallari ta'mirtalab ahvolga kelib qolgan suv tarmoqlari mavjud. Biroq er osti quvurlarining yaroqsiz ahvolga kelib qolishi natijasida suv bosimi juda pasayib ketdi. Zebuniso aya Ahmedovaning tashabbusi bilan yangi quduq kavlanib, mahalladoshlari xonadonlariga zilol suv kirib bordi. Shu bilan birga, hududdagi 49-umumta'lim maktabi, oilaviy poliklinika va 6-maktabgacha ta'lim muassasasi ham barqaror suv ta'minoti bilan ta'minlandi. “Zamin”ni Telegramʻda oʻqing!