Qidiruvdagi “Macheteli bezori” karavot ostida yashirinib yotgan joyida qoʻlga olindi (video)

Bugun, 27 sentyabr kuni, soat 15:30 atrofida Toshkent shahrining Olmazor tumanida bir yarim oy avval yuz bergan voqea boʻyicha gumonlanuvchi hisoblangan Shohrux Joʻrayev Qobil oʻgʻli qoʻlga olingan. Bu haqda Toshkent shahar IIBB matbuot xizmati xabar bermoqda.

Maʼlum qilinishicha, gumonlanuvchi qarindoshlaridan birining uyidan topilgan. U qoʻlga olingan vaqtida karavot ostida yashirinib yotgan edi.

“Olib borilgan tezkor-qidiruv tadbirlari natijasida, koʻrsatilgan qarshilikka qaramay, Joʻrayev Shohrux Qobil oʻgʻli qoʻlga olindi”, — deyilgan xabarda.

Eslatib oʻtamiz, shu yilning avgustida internetda “Spark” va “Jiguli” avtomobillaridagi bir guruh shaxslar oʻrtasida sodir boʻlgan hodisa tasvirlangan video tarqaldi. Unda bir guruh bezorilar bir yigitni koʻchada toʻxtatib, mashinasining oynalarini sindirishgan va oʻzini esa doʻpposlashgani tasvirlangandi. Ulardan birida machete quroli bor edi.

Endilikda voqeaning yana bir ishtirokchisi qidiruvda qolmoqda.

“Jinoiy guruhning yana bir aʼzosi Bahodir Baxtiyorovich Yuldashev qidiruvda qolmoqda”, - deyiladi xabarda.

Foto: IIBB
Toshkentliklar va poytaxt mehmonlaridan gumonlanuvchining turar joyi maʼlum boʻlsa, ushbu raqamlar orqali xabar berishi soʻraldi: 102, 272-98-39, 231-95-13, (98) 362-51-14.

Koʻp oʻtmasdan poytaxt IIBB axborot xizmati hodisa tafsilotlarini maʼlum qildi.

Unga koʻra, jabrlanuvchi – 23 yoshli A.Botirjon tanishi Shoxruhdan pul qarz olib, oxirgi 500 ming soʻmni qaytarolmagan. Joʻrayev Shoxruh oʻz sheriklari Bekzod Nuriddinov, G.Ziyovuddin, M.Muzaffar va I.Abdugʻani bilan “Vatan” kinoteatri yonida A.Botirjon va M.Jasur boʻlgan “Spark” mashinasini toʻxtatishgandi.

Keyinroq Shoxruh Joʻrayev va Bekzod Nuriddinov qidiruvga berilgandi. Tez orada 31 yoshli Bekzod Nuritdinov qoʻlga olindi, Shoxruh Joʻrayev esa shu kungacha qidiruvda edi. “Zamin” yangiliklarini “Twitter”da kuzatib boring