03:30 / 21.04.2021
2 140

Majruh qizga uylangan olim

Majruh qizga uylangan olim

Islom nikohni yomon ko‘rmaydi. Oila qurish Islomda juda savobli ish. Boshqa madaniyatdagi odam yoki Islom madaniyatini bilmaydigan inson buni tushunmaydi. Uylanishning savob ekanligiga dalillar bor. So‘z so‘zga ulanib, mavzudan chetlashib ketishdan, to‘g‘ri yo‘ldan adashib, manzilni topolmay qolaman deb qo‘rqayapman…

Oila qurish ham, tijorat ham savob. Shunday insonlar borki, savob uchun atayin uylangan. Shu kunlarda bo‘lib o‘tgan bir voqeani sizlarga aytib beray. Bir tanishim bor, uni yaxshi bilaman. Juda kibor, ishbilarmon, tartibli, pokiza, yaxshi bir podpolkovnik edi. U menga bir voqeani gapirib berganda hayron qolgan edim.

Otasi qo‘shnisining eshigini taqqillatib:
— Ziyoratingizga keldim, — deydi.
— Marhabo, marhabo ustoz! Qani, ichkariga kiring. Boshimizning tojisiz. Bizni juda xursand qildingiz, — deb to‘rga o‘tqazishibdi. Chunki u jiddiy, taniqli olim kishi bo‘lgan…

— Ustoz, qadam ranjida qilganingiz uchun Alloh sizdan rozi bo‘lsin. Biror xizmatingiz bormi? Bir og‘iz aytganingizda o‘zimiz borardik, sizni ovora qilmagan bo‘lardik. Qo‘lingizni, oyog‘ingizni o‘pardik. Ayting, nima xizmatingiz yoki istagingiz bor?
— Ha, Allohning amri, hazrati Payg‘ambarimiz sollallohu alayhi vasalam sunnatlariga muvofiq sizning qizingizga uylanmoq istagida edim, roziligingizni olmoqqa keldim», — deydilar.

Kutilmagan voqeadan qo‘shnisining boshidan bir chelak suv quyilganday bo‘libdi…
— Ustoz, mendan agar jonimni so‘rasangiz, jonimni ham beraman. Ammo qizim sizga loyiq emas! Qizimizning ikki oyog‘i shol, majruh. Biz — ota-onasi unga zo‘rg‘a qaraymiz. Siz ulug‘ olim bo‘lsangiz, sizga xizmat qiladigan jufti halol zarur! Qizimiz kasal bo‘lsa… — debdi.
Haligi olim kishi esa:
— Hammasidan xabarim bor, shu qizingizni menga berasiz — deb turib olibdi. Nochor qo‘shnisi rozi bo‘libdi va qizini unga beribdi. Shu qizdan haligi harbiy odam tug‘ilgan ekan.

Olim kishi: «Bu qiz nogiron bo‘lgani uchun unga hech kim uylanmaydi, chiroyli bo‘lganida hamma ketidan chopardi. Kel, men shu faqir, bechoraga uylanib, ko‘nglini ko‘taray, savob qozonay», — deb uylangan ekan…

Uylanish savob. Qo‘sha-qo‘sha savob olish uchun ham o‘sha qizga uylanibdi. Mana buni ulug‘lik, qahramonlik desa bo‘ladi! Bunday insonga tarixdan alohida bir sahifa ajratish kerak, menimcha! Amerikada bo‘lganda edi, bu hodisani katta reklama qilgan bo‘lur edilar.
Ha, uylanish ko‘ngil istagi, lekin savobdir…
«Islom va axloq» kitobidan
Manba: Azon.uz

Ctrl
Enter
Xato topdIngizmi?
Iborani ajratib Ctrl+Enter tugmasini bosing
Fikrlar (0)


Yangiliklar » Jamiyat » Majruh qizga uylangan olim