Oʻzbekistonda pullik tezkor avtomagistral quriladi

Oʻzbekistonda Toshkent – Andijon yoʻnalishida pullik tezkor avtomagistral barpo etiladi. Ushbu yoʻl ikki shahar orasidagi safar vaqtini 5 soatdan 3 soatgacha qisqartiradi.

3-fevral kuni Prezident Shavkat Mirziyoyev yirik transport infratuzilmasi loyihalari, jumladan, Toshkent – Andijon yoʻnalishidagi muqobil avtomobil yoʻlining qurilishi boʻyicha hisobot bilan tanishdi.

Loyiha Jahon banki koʻmagida ishlab chiqilgan boʻlib, magistralning umumiy uzunligi 314 kilometrni tashkil etadi. Yangi yoʻl faqat tezlikni oshirish bilan cheklanmay, balki mamlakatning yalpi ichki mahsulotini 2,6 % ga oshirish va yoʻl-transport hodisalarini 40 % ga kamaytirishga ham xizmat qiladi.

Loyihani amalga oshirish doirasida xalqaro tender e'lon qilindi va u etakchi xorijiy kompaniyalarning qiziqishiga sabab boʻldi.

Majlisda faqat ushbu yoʻl emas, balki boshqa muqobil magistrallar ham muhokama qilindi. Prezident Transport vazirligiga tirband yoʻnalishlarda yangi yoʻllar qurish, yoʻllarning sifatini yaxshilash va pullik xizmatlarni joriy etish boʻyicha qoʻshimcha loyihalar ishlab chiqishni topshirdi. “Zamin” yangiliklarini “Telegram”da kuzatib boring