3-fevral kuni Toshkent shahrining Olmazor tumanida joylashgan "Riviera" savdo markazida fojiaviy hodisa sodir boʻldi. Hodisa natijasida ushbu savdo markazida farrosh boʻlib ishlagan ayol halok boʻldi, deb yozmoqda uz24.uz sayti.
Baxtsiz hodisaning sababi nima?
Dastlabki ma'lumotlarga koʻra, hodisa liftning ayol joylashgan shaxtaga tushib ketishi natijasida sodir boʻlgan. Ayol ogʻir jarohatlar olib, voqea joyida vafot etgan.
Oʻzbekiston Respublikasi Bosh prokuraturasi matbuot xizmati ushbu voqea boʻyicha rasmiy ma'lumot berdi. Unga koʻra, 3-fevral kuni soat 11:10 da 45 yoshli Sh. M. "Riviera" savdo markazida farrosh boʻlib ishlagan va hodisa sodir boʻlgan vaqtda lift shaxtasiga kirib, shisha panellarni tozalayotgan boʻlgan.
Hodisa sodir boʻlgan paytda ayol lift shaxtasining burchagida turgan. Shu vaqtda lift kabinasi eshiklari yopilib, yuqoriga harakatlangan. Natijada liftning qarshi ogʻirliklari (protivovesi) pastga tushib, ayolni bosib qolgan.
Halok boʻlgan ayol haqida nimalar ma'lum?
Sh. M. Toshkent viloyatining Boʻka tumanida tugʻilgan. U 2020-yildan beri "Riviera" savdo markazida farrosh boʻlib ishlagan. Marhumaning ortida ikki nafar farzandi qolgan.
Oʻzbekiston Respublikasi Vazirlar Mahkamasi huzuridagi Sanoat, radiatsion va yadro xavfsizligi qoʻmitasi matbuot kotibi Bekzod Berdiyev hodisaning ehtimoliy sabablari haqida fikr bildirdi. Uning soʻzlariga koʻra, asosiy sabab lift shaxtasida ish olib borishda xavfsizlik qoidalariga rioya qilinmagani boʻlishi mumkin.
Hozirda voqea joyida prokuratura va ichki ishlar organlari xodimlaridan iborat tergov guruhi ishlamoqda. Hodisaning barcha tafsilotlarini oʻrganish va aybdorlarni aniqlash uchun tergovga qadar tekshiruv olib borilmoqda. Tekshiruv natijalariga koʻra, keyingi protsessual qaror qabul qilinadi. “Zamin” yangiliklarini “Telegram”da kuzatib boring
Ctrl
Enter
Xato topdIngizmi
Iborani ajratib Ctrl+Enter tugmasini bosingMavzuga oid yangiliklar
