O‘zbekistonda sayyohlar soni ilk bor 10 milliondan oshdi

Toshkent viloyati bojxona boshqarmasi rasmiy kanaliga ko‘ra, so‘nggi yillarda O‘zbekistonda turizm sohasi sezilarli darajada rivojlandi.

Turizm eksporti 1,6 barobarga oshib, 3,5 milliard dollarga yetdi. Bu sohada 2 mingdan ortiq yangi tadbirkor ish boshladi. Muhimi — o‘tgan yili xorijiy sayyohlar oqimi ilk bor 10 millionlik marradan oshdi.

Hududlarda turizm va servis infratuzilmasi jadal rivojlanmoqda. So‘nggi 8 yilda mahalliy va xorijiy investorlar tomonidan 6,5 milliard dollar sarmoya kiritilib, 130 mingta mehmon qabul qilish imkoniyati yaratildi. Joriy yilda bu raqam yana 30 mingtaga oshiriladi.

Parkent tumanidagi “Oltin bel” cho‘qqisida xalqaro darajadagi chang‘i zonasi barpo etilmoqda. Fransiyaning mashhur “Kurshavel” kurorti ham Yevropa standartlarida tog‘li turizm maskanlari tashkil etishga qiziqish bildirgan.

Prezident ta’kidlaganidek: “Boy tarixiy-madaniy merosimiz va betakror tabiatimiz sayyohlar sonini 2-3 barobar oshirish uchun yetarli.”

2040-yilgacha turizmning iqtisodiyotdagi ulushi 7 foizga, eksport hajmi 10 milliard dollarga yetkazilishi bo‘yicha strategiya ishlab chiqilmoqda.