Oktyabrdan Toshkent bog‘larida itli patrul ishga tushadi

2025-yil oktabrdan boshlab Toshkent shahri bog‘lari va istirohat maskanlarida “itli patrul” — xizmat itlari yordamida jamoat xavfsizligini ta’minlash bo‘yicha eksperimental loyiha boshlanadi, deb xabar berdi Nova24.uz.

Loyiha 2025-yil 1-oktabrdan 2026-yil 30-sentabrgacha sinov tariqasida amalga oshiriladi. Milliy gvardiya buyurtmasiga binoan maxsus tayyorlangan xizmat itlari jamoat joylarida narkotik moddalar, psixotrop vositalar va ularning o‘xshashlarini aniqlash uchun patrullik qiladi.

Quyidagi bog‘larda kinologik punktlar faoliyat boshlaydi: Botanika bog‘i, Furqat bog‘i, Tashkent City, “Anhor-Lokomotiv”, “Navro‘z”, Magic City, “Milliy bog‘”, G‘afur G‘ulom bog‘i, Green Park, Mirzo Ulug‘bek bog‘i, “Lokomotiv” va “Ashxobod” bog‘i.

Xodimlar Bojxona qo‘mitasi qoshidagi Milliy kinologiya markazida “narkotik izlash” va “antiterror” yo‘nalishlari bo‘yicha tayyorlangan. Patrullarni Toshkent shahar Milliy gvardiyasi va IIBB kinologiya bo‘limi amalga oshiradi. Agar loyiha samarali bo‘lsa, boshqa viloyatlarga ham tatbiq qilinadi. “Zamin”ni Telegramʻda oʻqing!