O'zbekistonda yer osti suvlari bo'yicha yangi qonun qabul qilindi

O'zbekistonda yer osti suvlardan foydalanish va quduq burg'ulashni tartibga soluvchi yangi qonun qabul qilindi, deb upl.uz xabar berdi. Ushbu hujjat Senat tomonidan tasdiqlandi va mamlakat suv resurslarini himoya qilishga qaratilgan.

Yangi qonunga ko'ra, agar yer osti suvlari hisoblagichsiz olinayotgan bo'lsa, soliq stavkasi odatdagi miqdordan 5 barobar ko'p bo'ladi. Bu choralar suvni hisobga olish uskunalarini o'rnatishni rag'batlantirish va nazoratsiz suv sarfini oldini olish uchun joriy etilgan.

Rasmiylarning ta'kidlashicha, so'nggi yillarda ayniqsa qishloq xo'jaligida sug'orish va xo'jalik ehtiyojlari uchun yer osti suvlari hajmi ancha oshgan. Shu bilan birga, suvdan hisob-kitobsiz foydalanish holatlari ham ko'p uchrab, bu suv zahiralariga xavf tug'dirmoqda.

Qonundagi yana bir muhim o'zgarish — quduq burg'ulash tartibidir. Ilgari har bir quduq uchun alohida ruxsatnoma talab etilgan bo‘lsa, endi burg'ulash faoliyati uchun yagona ruxsatnoma beriladi. Bu o'zgarish suv qatlamlarining kamayishini oldini olish va nazoratni kuchaytirish maqsadida kiritilgan.

Shuningdek, qonun Soliq kodeksi hamda "Litsenziyalash, ruxsat berish va xabardor qilish tartib-taomillari to'g'risida"gi qonunga o‘zgartirishlar kiritadi. Ular vijdonli foydalanuvchilar uchun ruxsat tartiblarini soddalashtirish, qonunbuzarliklar uchun esa javobgarlikni kuchaytirishga qaratilgan. Qonun ijrosi ustidan nazorat tegishli idoralar va huquqni muhofaza qiluvchi organlar zimmasiga yuklatiladi.

Qonunning qabul qilinishi sababi — ruxsatsiz quduqlar qazilishi va nazoratsiz suv olish holatlarining ko‘payishidir. Ayrim hududlarda fermerlar va korxonalar davlat organlari roziligisiz quduqlar qazib, yer osti suvlari ortiqcha sarflangan. Yangi soliq chorasi va litsenziyalash qoidalari ana shunday qonunbuzarliklarning oldini olishga xizmat qiladi.

Ma’lumotlarga ko‘ra, O‘zbekistonda yer osti suvlari mamlakatdagi jami suv resurslarining 20 foizini tashkil qiladi. Ammo ularning zahiralari qishloq xo‘jaligidagi ortiqcha foydalanish natijasida kamaymoqda. “Zamin”ni Telegramʻda oʻqing!