Imtiyozli kreditlar 10 daqiqada rasmiylashtirilmoqda

O'zbekistonda raqamlashtirish tufayli imtiyozli kreditlarni rasmiylashtirish muddati 3 kundan 10 daqiqagacha qisqartirildi, deb kursiv.media sayti xabar berdi.

Bank sektori vakillari Oliy Majlis Qonunchilik palatasi deputatlariga hujjatlarni avtomatik tekshirish va onlayn xizmatlarning rivojlanishi hisobiga kredit berish jarayoni shaffoflashgani, korrupsiya imkoniyatlari esa kamayganini ta'kidladilar.

Shu bilan birga, deputatlar hujjatlarni soxtalashtirish, imtiyozli kreditlarni o'zlashtirish va maqsadsiz sarflash, noqonuniy talab va to'lovlar yuzasidan holatlarni qayd etdilar. Bu muammoli kreditlar ulushining oshishiga olib kelmoqda.

2024 yilda Hisob palatasi 6 ta tijorat bankini tekshirgan. 858 mlrd so'mlik imtiyozli kreditlardan 140 mlrd so'm muammoli deb topilgan. Shuningdek, 176 mlrd so'm mablag' korxonalar hisobiga tushirilmagan.

Oilaviy tadbirkorlik dasturlaridagi muammoli kreditlar hajmi 1,7 trln so'mga yetgan. Bundan tashqari, huquqni muhofaza qiluvchi organlar tomonidan 127 mlrd so'mlik talon-toroj holatlari aniqlangan.

Deputatlar banklarni raqamlashtirishni davom ettirishga, moliyachilarni esa korrupsiyaga qarshi xalqaro tajribani o'rganib, sun'iy intellektni joriy etishga chaqirdilar. “Zamin”ni Telegramʻda oʻqing!