O‘zbekistonda o‘rtacha harorat 1,5°C ga oshdi

O‘zbekistonda so‘nggi o‘n yilliklarda iqlim ancha o‘zgargan, deb xabar berdi UPL.uz BMT ekspertlari hamkorligida O‘zgidromet o‘tkazgan tadqiqotga asoslanib. Ma’lumotlarga ko‘ra, 1950 yildan 2020 yilgacha respublikada o‘rtacha yillik harorat taxminan 1,5°C ga oshgan. Bu Markaziy Osiyodagi o‘rtacha ko‘rsatkichdan yuqori.

2000-yillar boshida O‘zbekistonda yiliga o‘rtacha 4–5 ta 40°C dan yuqori haroratli issiq kunlar kuzatilgan bo‘lsa, 2020-yillarga kelib bu son 9–11 taga yetgan. Bu, ayniqsa, Surxondaryo, Qashqadaryo, Xorazm va Qoraqalpog‘iston kabi hududlarda yaqqol sezilmoqda.

Bu kabi haroratlar inson salomatligiga, ayniqsa, keksa yoshdagilar va ochiq havoda ishlovchilar uchun xavf tug‘dirmoqda. Qishloq xo‘jaligi ham zarar ko‘rmoqda — suv tanqisligi va haddan tashqari harorat sabab hosildorlik kamaymoqda. Shuningdek, suv resurslarini boshqarish tobora murakkablashmoqda — daryo va kanallar tez qurib qolmoqda.

2023 yil 3 avgust kuni Nukusda havo harorati 47,6°C ga yetdi — bu faqat O‘zbekiston uchun emas, balki butun Markaziy Osiyo uchun rekord hisoblanadi.

Mutaxassislar iqlim o‘zgarishiga moslashish uchun ob-havo monitoringini kuchaytirish, meteorologik stansiyalarni modernizatsiya qilish va ijtimoiy-iqtisodiy moslashuv choralari ko‘rishni tavsiya etmoqda.