Sariosiyo aeroporti 30 yildan so‘ng ish boshladi

30 may kuni Surxondaryo viloyatidagi “Sariosiyo” aeroporti kapital ta’mirdan so‘ng ilk yo‘lovchi reysini qabul qildi, deb Kursiv Media xabar berdi.

Toshkentdan uchib kelgan Silk Avia aviakompaniyasi samolyoti suv arkalari ostida kutib olindi. Yo‘lovchilarni non va an’anaviy musiqa sadolari bilan kutib olishdi. Endilikda “Sariosiyo”ga Toshkentdan haftasiga ikki marta reys amalga oshiriladi.

Aeroport 30 yil oldin faoliyatini to‘xtatgan edi. 2023 yilda prezident Shavkat Mirziyoyev uning ishini tiklashni topshirdi. Ta’mirlash davomida uchish-qo‘nish yo‘lagi yangilandi, samolyotlar uchun yo‘laklar rekonstruksiya qilindi va to‘xtash joylari jihozlandi.

Terminal bir vaqtning o‘zida 100 nafar yo‘lovchini qabul qila oladi. Aprel oyining oxirida amalga oshirilgan texnik reys aeroportning xavfsizlik talablariga javob berishini tasdiqladi. “Zamin”ni Telegramʻda oʻqing!