O‘zbekistonda yashil hududlar uchun maxsus agentlik tashkil etiladi

O‘zbekistonda o‘rmonchilik va yashil zonalarni rivojlantirish, shuningdek cho‘llanishga qarshi kurash bilan shug‘ullanuvchi maxsus agentlik tashkil etiladi, deb xabar berdi Nova24.uz.

Prezident qaroriga ko‘ra, yangi tuzilma Ekologiya, atrof-muhitni muhofaza qilish va iqlim o‘zgarishi vazirligi huzuridagi O‘rmon xo‘jaligi agentligi asosida shakllantiriladi. Agentlik o‘rmonlar bo‘yicha davlat hisobini, kadastrini yuritadi, shuningdek ko‘chatlar va buta parvarishlash markazlari tarmog‘ini kengaytiradi.

Agentlik quyidagi yo‘nalishlarda faoliyat yuritadi:
• O‘rmonlarni yaratish, saqlash, tiklash va ulardan oqilona foydalanish bo‘yicha davlat dasturlarini ishlab chiqish va amalga oshirish.
• O‘rmon xo‘jaligini modernizatsiya qilish va barqaror rivojlantirish uchun sarmoya jalb qilish.
• Iqlim o‘zgarishi oqibatlarini yumshatish choralarini ishlab chiqish.
• Cho‘llanish va yerlarning yemirilishiga qarshi choralarni muvofiqlashtirish.
• Dekorativ daraxt va butalar bo‘yicha urug‘chilik tizimini va in vitro laboratoriyalarini joriy qilish, sertifikatlash va standartlashtirish tizimini yaratish.
• “Aqlli o‘rmon” kabi raqamli texnologiyalarni joriy etish.
• Xorijiy ekspertlarni xalqaro grantlar orqali jalb qilish.

Yangi agentlik “Yashil makon” umumxalq loyihasining ijrosini ta’minlovchi ijro etuvchi organ sifatida faoliyat yuritadi.