O‘zbekistonda tarvuz narxi bir haftada uch baravarga arzonlashdi

EastFruit ma’lumotlariga ko‘ra, O‘zbekistonda so‘nggi haftada tarvuzning ulgurji narxi uch baravarga tushib ketdi, deb xabar berdi NOVA24.

Narxning pasayishiga asosiy sabab — ichki bozorga mahsulot hajmining keskin oshishi bo‘ldi. Toshkentdagi ulgurji bozorlarga yirik tarvuz partiyalari 16–22 may kunlari, ya’ni odatdagidan bir hafta erta kirib kelgan.

23-may holatiga ko‘ra, 1 kg tarvuz ulgurji narxi 7000 so‘mga yetgan bo‘lib, bu 2021-yildan buyon eng yuqori daraja hisoblangan. Biroq 23-maydan 30-mayga qadar narx 2,8 baravar kamayib, 2500 so‘mga tushgan. Bu so‘nggi 5 yildagi eng keskin haftalik pasayish hisoblanadi.

Natijada, may oxiridagi narx 2024-yilning shu davriga nisbatan ikki baravar arzon, lekin 2023-yilga qaraganda 25% yuqori bo‘ldi.

Narxning tushishi eksport hajmining oshishiga xizmat qilishi kutilmoqda. 2020-yildan beri tarvuz O‘zbekistonning muhim eksport meva-sabzavot mahsulotlaridan biri bo‘lib kelmoqda. 2023-yilda mamlakat 104,7 ming tonna tarvuz eksport qilgan holda rekord natijaga erishgan. “Zamin”ni Telegramʻda oʻqing!