O‘zbek tadbirkor ayollar Hindistonda $13 mlnlik shartnomalar imzoladi

O‘zbekistonlik tadbirkor ayollar Hindistonga xizmat safari davomida umumiy qiymati 13 million dollar bo‘lgan shartnomalarni imzolashdi, deya xabar berdi Savdo-sanoat palatasi, UPL manbasiga asoslanib.

Eng yirik kelishuv — $3 millionlik tibbiy buyumlarni etkazib berish bo‘yicha Gokal International klinikasi bilan tuzilgan. Shuningdek, tibbiy kiyim eksporti uchun $2,5 mln, to‘qimachilik mahsulotlari uchun esa $1 mlnlik kelishuvlar amalga oshirildi.

Bu shartnomalar nafaqat tibbiyot va to‘qimachilik, balki ta’lim sohasini ham qamrab oladi. Biroq hozircha ta’lim bo‘yicha kelishuvlar tafsilotlari ochiqlanmagan.

2025-yil may oyi boshida O‘zbekiston va Hindiston o‘rtasidagi tovar aylanmasi $383 millionga yetdi. 2024-yilning shu davrida bu ko‘rsatkich $280,6 million edi.

Tashrif davomida ayollar hind kompaniyalari bilan muzokaralar o‘tkazib, mahsulotlarini namoyish qilishdi hamda eksport bozorlarini kengaytirish imkoniyatlarini muhokama qilishdi. So‘nggi yillarda O‘zbekiston eksportni rivojlantirishga katta e’tibor qaratmoqda va Hindiston bu borada muhim hamkorga aylanmoqda.

2024-yilda Hindistonga paxta mahsulotlari eksporti 15%ga oshgani bunga misoldir.