O‘zbekiston 200 ta elektrobus xarid qilishi mumkin

O‘zbekiston Xitoydan 200 ta elektrobus xarid qilish imkoniyatini o‘rganmoqda. Shuningdek, 1000 ta avtobus xarid qilish loyihasi ham muhokama qilinmoqda. Bu haqda Transport vazirligi axborot xizmati ma’lum qildi, deb Nova24 xabar berdi.

Uchrashuvda transport vaziri o‘rinbosari Ilhom Abdug‘afforov va Xitoy Eksport-import banki rahbari Chen Xuayu boshchiligidagi delegatsiya o‘rtasida hamkorlik masalalari muhokama qilindi. Unda transport infratuzilmasini rivojlantirish, harakatdagi transport parkini yangilash va bank tomonidan moliyalashtirish loyihalari haqida so‘z yuritildi.

Toshkent–Samarqand va Toshkent–Andijon pullik avtomobil yo‘llari, Toshkent–Samarqand yuqori tezlikdagi temir yo‘l liniyasi hamda Toshkent va viloyatlarda jamoat transportini takomillashtirish kabi loyihalar ham ko‘rib chiqildi.
Tomonlar 200 ta elektrobus uchun kredit shartnomasini tez fursatda kelishib, imzolash ustida ham ishlamoqda.