Fitch Ratings xalqaro agentligi O‘zbekistonning uzoq muddatli xorijiy valyutadagi kredit reytingini bir pog‘onaga oshirib, “BB-”dan “BB”ga ko‘tardi, deb Nova24.uz xabar berdi.
Mazkur reyting davlatning tashqi qarzlarini o‘z vaqtida qaytarish qobiliyatini ifodalaydi. Reyting qanchalik yuqori bo‘lsa, to‘lovlardagi tavakkalchilik shunchalik past bo‘ladi. Avvalgi “BB-” reytingi “spekulyativ” yoki “investitsion emas” deb baholangan edi.
Yangi “BB” reytingi O‘zbekiston kredit beruvchilar nazarida ishonchliroq davlatga aylanganini bildiradi. Bu xorijiy kreditlarni arzonroq olish va chet el investorlarini jalb qilish imkoniyatini oshiradi. Reytingning ko‘tarilishi islohotlar sur’ati va o‘rta muddatli o‘sish istiqbollari bilan bog‘liq.
Islohotlar qatoriga pul-kredit siyosatiga ishonchni oshirish, davlat institutlari shaffofligini kuchaytirish, xususiylashtirish rejalarini ilgari surish kiradi. 2024 yildagi ijobiy fiskal natijalarga energiya tariflarini liberallashtirish va subsidiya tizimini isloh qilish ta’sir ko‘rsatgan.
Agentlik 2025–2026 yillarda iqtisodiy o‘sish 6,3% atrofida bo‘lishini taxmin qilmoqda. Bu o‘sishga davom etayotgan islohotlar, xomashyo (ayniqsa, oltin)ga barqaror talab hamda pul o‘tkazmalari hajmining oshishi turtki bo‘ladi.
Biroq agentlik reytingning pasayish xavfini ham eslatib o‘tdi. Bunday holat, masalan, pul o‘tkazmalari keskin kamayishi, xomashyo narxlarining pasayishi va savdo balansidagi jiddiy salbiy o‘zgarishlar tufayli yuzaga kelishi mumkin.
Shuningdek, iqtisodiy o‘sish sur’atining susayishi, byudjet xarajatlarining oshishi, milliy valyutaning keskin qadrsizlanishi yoki davlat tomonidan berilgan kafolatlarning bajarilishi salbiy ta’sir ko‘rsatishi mumkin.
Reytingning yana yaxshilanishi islohotlarning izchil va tez amalga oshirilishiga, makroiqtisodiy barqarorlik va davlat boshqaruvi sifatining yaxshilanishiga bog‘liq. “Zamin”ni Telegramʻda oʻqing!
Ctrl
Enter
Xato topdIngizmi
Iborani ajratib Ctrl+Enter tugmasini bosing Mavzuga oid yangiliklar
