Mobiuz 300 million dollarga sotilishi mumkin

O‘zbekiston mobil aloqa operatori Mobiuz’ni 300 million dollarga sotishni rejalashtirmoqda, deb xabar berdi Kursiv.media Bloomberg manbalariga tayanib. Hukumat Qatardan, Saudiya Arabistonidan, Ozarbayjondan va Yevropadan investorlarni jalb qilishga umid qilmoqda.

Mobiuz mamlakatdagi to‘rtinchi yirik mobil operator hisoblanadi. BMI tahliliy kompaniyasi ma’lumotlariga ko‘ra, 2024 yil oxirida uning bozordagi ulushi 20,9% ni tashkil etgan. O‘sha vaqtda O‘zbekistonda umumiy abonentlar soni 35,6 million nafarga yetgan. 2024 yilda Mobiuz’ning daromadi 164 million dollar, EBITDA ko‘rsatkichi esa 41 million dollarni tashkil qilgan.

Kompaniyaning 100% ulushini sotish jarayoni Prezident Shavkat Mirziyoyev tomonidan boshlangan keng qamrovli xususiylashtirish dasturi doirasida amalga oshirilmoqda. O‘zbekiston 29 ta yirik korxonaning aktivlarini xususiylashtirish orqali kamida 10 trillion so‘m ($786 million) miqdorida mablag‘ jalb qilishni rejalashtirgan. Bu esa davlat iqtisodiyotdagi ulushini qisqartirish va xorijiy investitsiyalarni jalb qilish strategiyasining bir qismidir.

Mobiuz’ni sotish bo‘yicha tender 2025 yil iyun oyida e’lon qilingan. Qiziqqan investorlar 1 avgustga qadar qiziqish xatlarini topshirishlari lozim. Bitim bo‘yicha maslahatchi sifatida Rothschild & Co kompaniyasi jalb qilingan.

VEON kompaniyasi O‘zbekistonda o‘z biznesini kengaytirish imkoniyatlarini doimiy ravishda ko‘rib chiqayotganini ma’lum qilgan, ammo bu tenderda ishtirok etishini rasman tasdiqlamagan. “Zamin”ni Telegramʻda oʻqing!