Farg‘onada H&M uchun kiyim tikiladigan fabrika ochildi

Farg‘ona viloyati Qo‘shtepa tumanida Innovative Apparel nomli yirik tikuvchilik fabrikasi o‘z faoliyatini boshladi. Korxona H&M brendi uchun ilk buyurtmalarni oldi, deb xabar berdi Kursiv.media.

Ochilish marosimida viloyat hokimi Xayrullo Bozorov va tadbirkor Muzaffar Razzakov qatnashdi. Fabrikaning ishga tushirilishi mamlakat mustaqilligining 34 yilligiga to‘g‘ri keldi.

Loyiha Shri-Lanka hamkorlari bilan birgalikda amalga oshirildi. Investitsiya hajmi $15 mlnni tashkil etadi. Korxona to‘liq quvvat bilan ishlaganda 3,5 ming odamni ish bilan ta’minlaydi.

Innovative Apparel mahsulotlari Rossiya, Eron, Pokiston, Tailand, Qirg‘iziston va BAAga eksport qilinadi. Shuningdek, korxona hududida o‘quv markazi va tibbiy xizmat punktlari tashkil etiladi.