O‘zbekiston fuqarolari joriy yilning 25 sentyabridan boshlab Iordaniyaga vizasiz sayohat qilish imkoniga ega bo‘ladi. Bu haqda O‘zbekiston Tashqi ishlar vazirligi matbuot kotibi Ahror Burxonov xabar berdi.
Uning aniqlik kiritishicha, O‘zbekiston va Iordaniya o‘rtasida vizasiz rejimni joriy etish to‘g‘risidagi rasmiy bitim imzolanganidan 30 kun o‘tgach, ya’ni 25 sentyabrdan kuchga kiradi. Endilikda o‘zbekistonliklar Iordaniyada 30 kungacha vizasiz qolishlari mumkin. Bu esa sayohatchilar uchun katta qulaylik va erkinlik yaratadi.
Ma’lumki, 26 avgust kuni Samarqand shahrida O‘zbekiston prezidenti Shavkat Mirziyoyev va Iordaniya podshohi Abdulla II ibn al-Husaynning muzokaralari bo‘lib o‘tdi. Ushbu uchrashuv natijasida tomonlar o‘zaro kirish vizasi talabidan ozod qilish to‘g‘risida kelishuvga erishdi. Bu esa ikki davlat o‘rtasidagi do‘stlik va hamkorlik aloqalarini yanada mustahkamlaydi.
Shu bilan birga, bu qadam nafaqat turistlar uchun qulaylik yaratadi, balki biznes va ta’lim sohasida ham imkoniyatlarni kengaytiradi. Endilikda O‘zbekistonliklar Iordaniyaning tarixiy obidalari, mashhur turistik maskanlari va madaniy yo‘nalishlarini vizasiz, oson va tezkor tarzda zyorat qilishlari mumkin bo‘ladi.
Turizm sohasidagi bu yangi imkoniyat ikki mamlakatning madaniy almashinuvi va iqtisodiy hamkorligini rivojlantirishda ham muhim ahamiyat kasb etadi. Bu esa kelgusidagi sayohatlar va turizm loyihalari uchun yangi imkoniyatlar eshigini ochmoqda.
“Zamin”ni Telegramʻda oʻqing!
