O‘zbekiston Respublikasi Vazirlar Mahkamasining 2025 yil 28 avgustda qabul qilgan 543-sonli qaroriga asosan, ichki ishlar organlarida uzoq yillar samarali mehnat qilgan va pensiyaga chiqqan ayrim toifadagi xodimlar hamda ularning oila a’zolari uchun muhim imtiyoz joriy etildi. Mazkur qarorga ko‘ra, ularga avval xizmat davrida vaqtincha foydalanish uchun berilgan uy-joylar davlat mablag‘lari hisobidan shaxsiy mulk sifatida rasmiylashtirib berilmoqda.
Bu yangilik, avvalo, faoliyat davomida mamlakat xavfsizligi va jamiyat tinchligi yo‘lida xizmat qilgan, biroq shaxsiy turarjoyga ega bo‘lmagan xodimlarning hayotida katta ijtimoiy o‘zgarish yasaydi. Qarorga muvofiq, 2022 yil 4 iyulga qadar xizmat muddatini to‘liq bajarib, pensiyaga chiqqanlar yoki xizmat davrida sog‘lig‘ida muammo paydo bo‘lib, rezervga yoki iste’foga chiqarilgan ichki ishlar organlari pensionerlari ushbu tartibdan foydalanish huquqiga ega.
Eng muhimi, ushbu imkoniyat nafaqat sobiq xodimlarga, balki ularning yaqin qarindoshlariga, ya’ni oila a’zolariga ham tatbiq etiladi. Agar ularning nomida shaxsiy turarjoy mavjud bo‘lmasa, ular ham mazkur imtiyozdan foydalanishlari mumkin. Bu, o‘z navbatida, fuqarolarni ijtimoiy jihatdan qo‘llab-quvvatlashning yana bir yorqin namunasidir.
Shuningdek, bu huquq vafot etgan xodimlar va ichki ishlar tizimida faoliyat ko‘rsatgan pensionerlarning oila a’zolariga ham tegishli bo‘lib, ular ham ushbu imkoniyat doirasida xonadon bilan ta’minlanadi. Qarorda ta’kidlanishicha, uy-joylar davlat tomonidan ajratilgan mablag‘lar hisobidan shaxsiy mulk sifatida rasmiylashtirilishi belgilab qo‘yilgan. Bu nafaqat moddiy yordam, balki yuksak e’tirof ifodasidir.
“Zamin”ni Telegramʻda oʻqing!
